剛剛跟印尼姐姐說完的一篇「光酥餅的故事」

頭先，我家的印尼姐姐指著我正在偷吃娘子大人買回來的迷你光酥餅問：「咩嚟ga?」

見一位印尼姐姐對我國的偉大發明感好奇，我便立即導賞員上身，邊噴餅邊跟好講解有關光酥餅的歷史。

「妳睇我呢個餅係迷你版來的，其實真正的光酥餅大呢個餅成十倍GA！呢個餅對我地今天中國的貿易發展有著重大的幫助呀！」

印尼姐姐雙眼瞪得大大的望著我拿著的光酥餅，期待著我把故事講下去。

「係古代的中國，即係六／七／八年前啦！D商人要去做生意時都要走遠路wor，咁以前係冇巴士，又冇地鐵，加上當時D商場無而家咁多的，就算去附近街市買餸都要由馬鞍山行到旺角啦，更何況去第二個城市做生意呢？」

印尼姐姐好像嘆了一口氣，心裡在記念著當年來港開路x的印尼姐姐前輩們。

「咁好似香港D商人要去北京做生意，又或者香港的特首要去北京交代香港的事務呢！咁以家搭飛機去都要五個鐘啦！何況以前無飛機呢！就算騎馬去都要大半個月嘛！咁途中又無7仔，當年又未發明朱古力和曲奇餅，咁這些商人的太太便發明了光酥餅了，因為呢塊餅夠大又輕又夠飽又夠經濟，咁D生意人就隨手放五六個係背包便可以遠行了，方便到極！」

見印尼姐姐好像不太理解北京在那裡，我決定再給另一個例子。

「妳知道印尼去香港有幾遠嘛？」

印尼姐姐以微笑點頭來表示知道。

「咁以前D香港商人要去印尼做生意，但又無飛機搭，所以要自己划船去的，咁路途遙遠，佢地就會帶著十分幾個光酥餅做糧食了。就算架船遇到風浪沉咗，佢都會帶住塊餅跳落海。」

「吓，咁塊餅會濕WOR！」印尼姐姐問。

「係呀！塊光酥餅濕咗後會發大，咁就會變成可以食的救生艇了，食落仲會有D鹽味TIM……」

印尼姐姐沒等我把故事說完便走開了……